२३९ जना यात्रु सहित मलेसिया एअरलाइन्सको विमान बेपत्ता

काठमाडौं,फागुन २४–

मलेसियाबाट बेइजिङका लागि उडेको मलेसिया एअरलाइन्सको विमान बेपत्ता भएको छ । २३९ जना यात्रु बोकेर बेइजिङतर्फ प्रस्थान गरेको विमान शनिवार विहानै देखि हराएको हो । बेपत्ता विमानको स्थिती अझै अज्ञात छ । एमएच–३७० को विमान स्थानिय समय अनुसार विहान २ः४० बजेदेखि सम्पर्कविहिन भएको हो । विमान उडेको २ घन्टापछि सम्पर्कविहिन भएको एएफपीले जनाएको छ ।विमानले विहान ६ः३० मा बेइजिङमा अवतरण गरिने अपेक्षा गरिएको थियो । बिमान भियतनामी हवाइक्षेत्रबाट बेपत्ता भएको जनाइएको छ । 

विमानले का माउ क्षेत्र प्रबेश गर्ने वित्तिकै सम्पर्क गुमाएको थियो । विमानले हो चि मिन्ह सिटी ट्राफिक कन्ट्रोलसँग अन्तिम सम्पर्क गरेको थियो । बोइङ७७७–२००ले १३ देशका तीन जना बच्चा सहित २२७ जना यात्रु बोकेको थियो भने विमानको चालक दलका सदस्यको संख्या १२ थियो । बेपत्ता विमानको अहिले खोजी कार्य भइरहेको भियतनामी रक्षा मन्त्रालयलाई उद्धृत गर्दै एएफपीले खबर लेखेको छ । मलेसिया, चीन र भियतनामको संयुक्त प्रयासमा खोजी कार्य भइरहेको भियतनामी रक्षा मन्त्रालयले जानकारी दिएको छ ।