जातीय अधिकार दिनु हुँदैन : कोइराला

धरान, असार २१ - कांग्रेस केन्द्रीय सदस्य शेखर कोइरालाले आत्मनिर्णय अधिकार र जातीय अधिकार दिन नहुने बताएका छन् । उनले क्रिमिया टुक्रिएको सन्दर्भ जोड्दै आत्मनिर्णयको अधिकार र जातीय अधिकार दिएमा क्रिमियाको अवस्था व्यहोर्नु पर्ने बताए । कांग्रेस सुनसरी क्षेत्र नं १ को क्षेत्रीय समतिद्वारा कांग्रेसका पूर्वसभापति तथा पूर्व प्रधान मन्त्री स्वर्गीय गिरिजाप्रसाद कोइरालाको ९१ औं जन्म जयन्तीको अवसरमा शनिबार धरानमा आयोजित वृक्षारोण कार्यक्रममा कांग्रेस नेता कोइरालाले यस्तो धारणा राखेका हुन् । नेता कोइरालाले आत्मनिर्णय अधिकार र जातिय अधिकार दिएमा लोकतन्त्र भन्ने शव्दको अर्थ नहुने बताए । एक अर्को प्रसंगमा उनले शासकीय स्वरुप र संघीयताको बारेमा उच्चस्तरीय राजनीतिक सम्वाद समितिमा टुंगो नलागे नलागेसम्म संविधानको विषयमा एक शव्दपनि लेख्न नसकिने बताए। उहाले संविधान बनाउनु अगाडि नै शासकीय स्वरुपको टुंगो लगाउन सहमति, सहकार्य र एकताका साथ जानु पर्ने बताए । 

उनले राष्ट्रपतिय प्रणालीमा गएमा कांग्रेसकै व्यक्ति राष्ट्रपति बनेपनि त्यो निरङ्कुश हुने उल्लेख गर्दै संविधान भन्दा पहिला शासकीय स्वरुप पहिले टुंगो लाग्नु पर्नेमा जोड दिए । प्रधानमन्त्रीको प्रत्यक्ष निर्वाचन गरेपनि र राष्ट्रपतिको प्रत्यक्ष निर्वाचन गरेपनि कुरा एउटै भएको बताए । नेता कोइरालाले मिश्रित प्रणालीमा कांग्रेस जान नहुने जिकिर गर्दै कांग्रेस संसदीय व्यबस्थामै जानु पर्ने उल्लेख गरे। सुधारिएको संसदीय व्यवस्थामा पाँच वर्षमा दुईपटकमात्र अविश्वासको प्रस्ताव ल्याउन पाइने व्यवस्था गर्नु पर्ने बताए । उनले स्वर्गीय नेता गिरिजाप्रसाद कोइरालालाई सच्चा श्रर्दान्जली दिनका लागि सहमति, सहकार्य र एकताका साथ सवैलाई समेटेर अघि बढ्दै सच्चा श्रद्धान्जलीको रुपमा मुलुकलाई संघीय लोकतान्त्रिक संविधान दिनु पर्ने बताए ।