तीनजना मारेको बदला लिन ९१ निर्दोषको हत्या

(एजेन्सी)– तीनजना इजरायली युवाहरुको मृत्यु पछि इजरायलका प्रधानमन्त्री बेन्जामिन नेतन्याहुले पूरा संसारको अगाडि यी युवाहरुको हत्याको बदला लिएरै छाड्ने धम्की दिएका थिए । उनले भनेका थिए कि चाहे जे सुकै होस् यी युवाहरुको हत्या गर्ने मानिसलाई खोजेर उनीहरुको मृत्युको बदला लिएर मात्र मर्नेछु । बदलाको यो कारवाहीमा अहिलेसम्म ९१ निर्दोष मानिसहरुको हत्या गरिसकिएको छ । इजरायलद्वारा गाजा पट्टीबाट रकेट हमला रोक्नका लागि दुई दिन पहिला सुरु गरिएको ‘अपरेसन प्रोटेक्टिभ एज’ मा अहिलेसम्म ९१ प्यालेस्टिनीहरु मारिएका छन् र ५०० जना भन्दा बढि घाइते भएका छन् । 

बिहिबार प्यालेस्टिनी अधिकारीहरुले उक्त घटनाको पुष्टि गरे र इजरायलका प्रधानमन्त्री बेन्जामिन नेतन्याहूले संघर्षलाई जारी राख्ने बताएका छन् । समाचार एजेन्सी इफेका अनुसार, प्यालेस्टिनी स्वास्थ्य मन्त्रालयले घाइतेको संख्या ५६७ रहेको जसमध्ये २० जनाको अवस्था गम्भिर भएको बताएको छ । घाइते हुनेमा धेरैजसो महिला र बच्चाहरु भएको बताइएको छ । उता इजरायली सैनिक सूत्रका अनुसार बिहिबार इस्लामिक जेहादका तीन सदस्य पनि मारिएका थिए । गाजामा उनीहरुको कारलाई निशाना बनाइएको थियो । उत्तरी पट्टीमा हमास प्यालेस्टिनी मुभमेन्टका एक सदस्य पनि मारिएका थिए ।