आजराती अर्जेन्टिना र जर्मनी आफ्नो सान र इतिहास जोगाउन आतुर

काठमाडौं, आषाढ २९ । विश्वकप फुटबलको फाईनल खेल आज राती हुनेछ । ब्राजिलमा जारी विश्वकपको २० औं संस्करणमा दुई परम्परागत प्रतिद्धन्दीहरु जर्मनी र अर्जेन्टिना उपाधिको लागि भिड्दैछन् । आज राती रियो दि जेनेरीयोमा हुने फाईनल खेल विश्वका झण्डै एक अरब दर्शकले टेलिभिजनमार्फत प्रत्यक्ष हेर्ने अनुमान गरिएको छ । यो खेल जितेमा जर्मनी लेटिन अमेरिकी माटोमा विश्वकप जित्ने पहिलो युरोपियन टीम बन्नेछ । साथै जर्मनीको लागि सन् १९९० पछि यो पहिलो उपाधि हुनेछ । यस विपरित अर्जेन्टिनाले विश्वकप जित्यो भने दक्षिण अमेरिकी सान जोगिनेछ भने अर्जेन्टिनाका लागि २८ वर्षमा पहिलो विश्वकपको उपाधि हुनेछ । 

मराकाना रंगशालामा हुने खेलको सबै ७९ हजार टिकट विक्री भएको छ । खेलको सुरक्षाका लागि रियो दि जेनेरीयोमा २५ हजार सुरक्षाकर्मी परिचालन गरिएको छ । रियो शहरकै इतिहासमा यो अहिलेसम्मकै ठूलो सुरक्षा प्रवन्ध भएको बताइएको छ । फाईनल खेलका लागि १५ भन्दा बढी राष्ट्रका सरकार प्रमुख र विशिष्ट अतिथिहरु ब्राजिल पुगेका छन् । ब्रजिलियन राष्ट्रपति डिल्मा रुसेफले पनि रंगशालामा उपस्थित भएर फाइनल खेल हेर्नेछिन् । विश्वकप अवधिभर विश्वका २ सय ३ राष्ट्रका झण्डै ७ लाख पर्यटक ब्राजिल पुगेको बताइएको छ ।