लगातारको वर्षाले चितवनको बघौंडा गाउँ डुवानमा

चितवन, आषाढ २८ । लगातारको वर्षापछि चितवनको माडीको मगुई खोलामा आएको बाढीले बघौंडा गाउँ डुबानमा परेको छ । खोलाको माथिल्लो भेगमा बनेको चेकड्यामका कारण खोलाले बहाबको दिशा परिवर्तन गर्दै गाउँ पसेको स्थानीय पीडितहरुले जनाएका छन् । मगुई खोलाले वरपरका पिपरीया, पौहारी र सिधुवा गाउँहरुलाई समेत क्षति पुर्‍याएको छ । माडीमा बग्ने बाँदरमुढे, चितइ, घाघरखोला र पतरेखोलाहरुले समेत वरपरको बस्तीमा आंशिक क्षति पुर्‍याएको स्थानीबासीले जनाएका छन् । बाढीले गाउँमा रहेका सम्पूर्ण घरहरु डुबाएको छ भने केहि घरहरु भत्किएका छन् । 

एकाबिहानै बस्तीमा खोला बग्दा पुरै बस्ती जलमग्न भएकाले जनजीवन अस्तव्यस्त भएको छ । पुरै माडी क्षेत्रमा सवारी आवागमन अवरुद्ध भएको छ । वर्षा हुन नरोकिएको अवस्थामा पुनः अर्को बाढी आए अहिलेको भन्दा ठूलो क्षति हुने भएकाले तत्काल क्षति न्यूनीकरण र निवारणको काम हुनुपर्ने स्थानीयबासीले माग रहेको छ । यसैबीच, माडीको अर्को ठूलो नदी रीउ खोलामा आएको बाढीले ननी छेउमै रहेको अमिलिया गाउँ डुबानमा परेको छ भने शालिक बोट र रामप्रसाद बिकको खोर बगाएको स्थानीयबासी भीमबहादुर बिकले जानकारी दिए ।