पेसावरमा उडिरहेको विमानमा आक्रमण एकको मृत्यु, दुई घाइते

पेसावर (एएफपी), असार १२ - पाकिस्तानकोे उत्तर-पश्चिम द्वन्द्वग्रस्त पेसावरमा मंगलबार अबेर राति अवतरण गर्न लागेको विमानमा गोली प्रहार भएको छ । साउदी अरबको रियादबाट आएको पाकिस्तान इन्टरनेसनल एयरलान्यस (पीआईए) को विमानमा भएको आक्रमणमा एक महिला यात्रुको मृत्यु भएको छ । विमानका दुई कर्मचारी घाइते भएका छन् । १ सय ७८ यात्रु सवार थिए । विमान जमिनबाट सय मिटर उचाइमा रहेको बेला गोली हानिएको थियो । विमानस्थल बाहिरबाट अज्ञात समूहले आठपटक गोली हानेको अधिकारीहरूले भनेका छन् । क्याप्टेनको नजिकबाट एक गोली गएको प्रहरीले जनाएको छ । 

यस्तो विषम परिस्थितिमा पनि चालकले धैर्य र हिम्मतका साथ विमानलाई सकुशल अवतरण गराएर ठूलो दुर्घटना टारेका थिए । सुरक्षा अधिकारीहरूले ती बन्धुकधारीको खोज गरिरहेको बीबीसीले जनाएको छ । तीन साताअघि कराँची विमानस्थलमा तालिवानहरूले आक्रमण ठूलो मानवीय हताहती भएको थियो । कराँची घटनापछि सेनाले उत्तरी बजिरिस्तानको आदिवासी क्षेत्रमा तालिवानविरुद्ध भीषण आक्रमण गरिरहेको छ । यसले प्रतिकारमा तालिवानबाट थप आक्रमण हुने खतरालाई बढाएको छ । सन् २०१२ को डिसेम्बरमा पनि पेसावर विमानस्थलमा तालिवानको रकेट आक्रमणमा ४ नागरिकको ज्यान गएको थियो । पाकिस्तान हवाई बल र कमर्सियल उडानका लागि उक्त विमानस्थलको प्रयोग हुँदै आएको छ ।