जर्मनी र अमेरिका तथा पोर्चुगल र घाना भिडदै, आज रातीका चारै खेल रोमाञ्चक

काठमाडौं, आषाढ १२ । ब्राजिलमा जारी विश्वकप फुटबलको नक आउट समीकरण भोलि बिहान तयार हुनेछ । समूह चरणका खेल भोलि बिहान सकिएसंगै नकआउट समीकरण बन्ने भएको हो । राति पौने १० बजे समूह जीको खेलमा जर्मनीले अमेरिकाको तथा पोर्चुगलले घानाको सामना गर्दैछ । जर्मनी र अमेरिका समान ४-४ अंकमा रहँदा घाना र पोर्चुगल १-१ अंकमा छन् । यो अवस्थामा चारै टिमको अर्को चरण प्रवेश सम्भावना कायमै छ । समान चार अंकमा रहँदा जर्मनी र अमेरिका बीचको खेल निकै प्रतिस्पर्धात्मक हुने देखिएको छ । घानासंग बराबरी गरेसंगै उपाधि दावेदार मानिएको जर्मनी झस्किएको छ । 

अमेरिकाले भने घानालाई पराजित गरेको थियो । प्रिक्वार्टरफाइनल पुग्नका लागि दुवै टिमले कम्तीमा बराबरी गर्नुपर्नेछ । यता, नक आउट चरण प्रवेशको झिनो सम्भावना बोकेको पोर्चुगलले घानामाथि आधा दर्जन गोलको अन्तर बनाएरमात्र पुग्ने छैन अर्को खेलमा जर्मनी र अमेरिकाबीच पनि फराकिलो अन्तरको नतिजा आउनु पर्ने हुन्छ । राति पौने २ बजे समूह एच्का खेलमा दक्षिण कोरियाले बेल्जियमको तथा अल्जेरियाले रुसको सामना गर्नेछ । यो समूहबाट स्पष्ट दुई जितका साथ बेल्जियमले यसअघि नै प्रिक्वार्टरफाइनलमा ठाउँ पक्का गरिसकेका अवस्थामा बाँकी तीन टोलीबीच अन्तिम १६ मा पुग्नका लागि टक्कर हुनेछ । 

अल्जेरिया ३ तथा रुस १ अंकमा रहँदा यो खेलमा जित मात्र हासिल गरे अल्जेरिया अर्को चरणमा पुग्नेछ । तर रुसलाई भने फराकिलो जितको आवश्यकतामात्र पर्नेछैन बेल्जियम र दक्षिण कोरियाबीचको नतिजाले पनि साथ दिनु पर्नेछ । एक अंकबाट पुछारमा रहेको दक्षिण कोरिया गोल अन्तरमा कमजोर भएकाले पनि बेल्जियममाथि सामान्य जितले समेत अर्को चरण प्रवेशको सम्भावना कठिन बनेको छ । एसियाको एक शक्तिको रुपमा रहेको दक्षिण कोरियाले जारी प्रतियोगितामा भने कुनै चमत्कार देखाउन सकेको छैन । तर एसियाका बाँकी टिम एक जितसमेत दर्ता नगरी बाहिरिइसकेका अवस्थामा अन्तिम टिमका रुपमा रहेको दक्षिण कोरियामाथि नक आउट चरण प्रवेश गर्ने भरोसा कायमै छ ।