इराकी विद्रोही परास्त गर्न अमेरिका सहयोगका लागि तयार : ओबामा

काठमाडौं, जेष्ठ ३० । अमेरिकी राष्ट्रपति बाराक ओबामाले इराकको इस्लामिक विद्रोहीलाई परास्त गर्न अमेरिका सहयोग गर्न तयार रहेको बताएका छन् । इराकको मोसुल र टिक्रिट सहर इस्लामिक विद्रोहीले आक्रमण गरी कब्जामा लिएपछि ह्वाइट हाउसमा इराकबारे प्रतिक्रिया दिंदै ओबामाले इस्लामिक विद्रोहीलाई परास्त गर्न इराकी सरकारलाई सघाउन अपील समेत गरे । तर, उनले अमेरिकी सेना इराकमा पठाउने/नपठाउनेबारे केही प्रतिक्रिया दिएका छैनन् । इस्लामिक विद्रोहीहरु दोस्रो ठूलो सहर मोसुल र टिक्रिट नियन्त्रणमा लिइ बग्दादतर्फ अघि बढिरहेका इराक सरकारले जनाएको छ । 

यसअघि राष्ट्रसंघका महासचिव बान कि मूनले विद्रोहीलाई नियन्त्रणका लागि इराकको हात बलियो बनाउन विश्व समुदायलाई एक हुन आह्वान गरेका थिए । आइएसआइएस नामक इस्लामिक अतिवादी संगठनले इराकलाई इस्लामिक राज्य बनाउने उद्घोषका साथ आक्रमण गरेको स्पष्ट पारेको छ । मोसुल सहरमा आक्रमण गरेलगत्तै प्रधानमन्त्री नुरी अल मलिकीले विद्रोहीको प्रभाव क्षेत्रमा संकटकाल लगाउन संसदसमक्ष आग्रह गरेका थिए । यता, विद्रोहीले एकपछि अर्को सहर कब्जा गर्नथालेपछि इराकी जनता त्रसित हुँदै विस्थापित भएका छन् । (एजेन्सी)